Дебар по четврт век добива градско кино

Културно-историските споменици во дебарскиот регион, активностите на Центарот за култура во Дебар и финансиската поддршка што оваа национална установа ја добива од Министертвото за култура, беа тема на средбата меѓу дебарскиот градоначалник Ружди Љата и министерката за култура Елизабета Канческа-Милевска која денеска работно ја посети општината, а потоа беше и во Бигорскиот манастир.

Тие го промовираа  градското кино, кое по четврт век повторно профункционира во Дебар, како и реконструираното влезно плато пред Центарот за култура, за што Министерството инвестираше 500 илјади денари. Со партерното уредување пред влезот, објектот доби нов лик, а киното во Дебар доби и дигитален проектор.

Канческа-Милевска нагласи дека целта е да се врати  интересот за следење на филмови на големото платно. Таа најави и проект за реконструкција на мал простор во Центарот за култура, кој ќе биде неменет за мала сцена. До крајот на годината, рече таа, се очекува да се реновира сцената и таа да биде ставена во функција за разни манифестации.

- Разговаравме за локалниот културен развој во Дебар, се одушевив  од целокупното познавање на градоначалнокот и неговата посветеност во културното наследство што е богатство за Дебар и околината. Информирав за проектот поддржан од Советот на Европа, со кој Министерството за култура и локалните власти на Дебар и Маврово Ростуше ќе го промовираат културното богатство што ќе придонесе за туристички развој на овој регион, рече Канческа-Милевска по средбата со Љата.

Градоначалникот се заблагодари за посетата и вети поддршка од локалната власт за продлабочување на соработката на културен план и побогат културен живот во градот. 

Министерката  за култура го посети и Бигорскиот манастир „Свети Јован Крстител“ , каде од игуменот Партениј и отец Доситеј беше запозната за текот на работите околу изградбата на конаците кои беа опожарени пред четири години.

- Среќна сум и душата ми е исполнета од сето она што можев да го видам. Сето ова што се прави е од огромно и непроценливо значење кое ќе остане за иднината на нашата држава,  за иднината на нашите генерации.  Бидејќи во Бигорскиот манастир имаме непроценливо богатство - вредни икони, фрескоживопис, книги..., сето е сочувано и реставрирано, рече Канческа-Милевска.

Информираше дека по опожарувањето на Горни палат во 2009 година, Министерството и Владата на Република Македонија континуирано издојуваат средства за реконструкција на опожарениот дел. Досега се издвоени 2,5 милиони евра,  а годинава се обезбедени уште 30 милиони денари. Опожарениот дел целосно ќе биде реконструиран до летото 2014 година.

Отец Доситеј се заблагодари на Владата и на верниците за донациите за обновување на Горни палат и најави изградба на Источен палат,  а догодина  во овој период се очекува тие да бидат осветени. 

ФОТО: Алфа

најчитано сега