Бесими: Европската интеграција бара придонес од целото општество

Процесот на европска интеграција на Македонија не е исклучиво во надлежност на државните институции, туку на целото општество, на сите граѓани, порача вицепремиерот задолжен за европски интеграции Фатмир Бесими.

- Европската интеграција е важен, комплексен и релативно долг процес. Ние треба да градиме капацитети за да го спроведеме процесот на интеграција на Македонија во ЕУ. Но, исто така, тие капацитети треба да ги подготвиме да бидеме конкурентни на европскиот пазар,  и да бидеме подеднакво подготвени како и сите други граѓани и институции од земјите членки на ЕУ во исполнувањето и почитувањето на стандардите и принципите што владеат во Унијата, рече тој.

- За овој процес да биде ефикасен нам ни се потребни ресурси. Токму затоа, сметам дека формирањето на една мрежа од експерти кои знаењето го стекнале на реномирани европски институции и работат на прашања поврзани со европската интеграција може да даде значителна поддршка и екпертиза во преговарачкиот процес, рече вицепремиерот Бесими.

Британскиот амбасадор во Македонија Кристофер Ивон се согласува дека за успешна реализација на овој евроинтеграцискиот процес е потребен ангажман на сите ресурси, на целокупното општество. Покрај на државните институции, потребен е и придонесот на поединецот, на цивилниот сектор, но и споделување на стекнато знаења за општо добро на државата.

- Европската интеграција е ваша задача, ваша одговорност. Ваш е и изборот дали сакате да ја преземете одговорноста. Мислам дека меѓународната заедница има изготвено многу јасен патоказ како Македонија ќе се движи кон своето членство во ЕУ, така што таа ја исполни својата обврска. Сега топката не е кај нас, туку кај државтата, рече Ивон.