Растат платите: Од април по најмалку 1000 денари за секој полицаец

Над 10.000 вработени во Министерството за внатрешни работи априлската плата ќе ја добијат со ветеното зголемување. Овластени службени лица и полициските службеници во МВР ќе добијат повисока плата за 5% во однос на онаа за март. Ако се има предвид дека просчената плата е околу 20.000 денари, покачувањето ќе биде најмалку 1000 денари.

Министерката за внатрешни работи, Гордана Јанкулоска, истакна дека ова усогласување на платите на полициските службеници е поддржано од граѓаните.

-Крајна цел е зголемување на износот на платите за 20% на полициските службеници и овластените службени лица етапно до 2017 година, истакна Јанкулоска.

Усогласувањето кое ќе трае во наредните две години ќе придонесе платите на вработените во МВР да се изедначат со платите на цариниците.

За оваа намена, додаде Јанкулоска, Владата обезбедила дополнителни 250 милиони денари.

Министерката нагласи дека од 2006 година, кога се дојдени на власт, во неколку наврати се реализирани покачувања на платите, кои сега се повисоки за 25 проценти, што според неа е најдобар показател за односот на Владата кон припадниците на МВР.

Паралелно со ова покачување, истакна таа, доколку се донесе евентуално ново покачување на платите за јавната администрација, истото за вработените во МВР ќе биде дополнително и независно од ова најавено покачување, кое ќе започне да се исплаќа со априлската плата.

Претседателот на Македонскиот полициски синдикат (МПС), Тихомир Климовски, истакна дека процесот на усогласувањето е започнат пред неколку години и е резултат на конструктивниот и одличен однос меѓу синдикатот и Владата.