Детската болница „Козле“ доби меѓународна награда за квалитетот на услугите

Меѓународната потврда за квалитетот на услугите е добиена на собирот на Global trade leaders club, што се одржа од 13 до 15 овој месец во Париз,  а во изборот учествуваа компании и институции од 90 држави.

Македонскиот Институт за белодробни заболувања кај децата „Козле“ доби Интернационална награда за квалитет на услугите, како признание за примена на сите стандарди и протоколи за лекување деца во областите пулмологија,  алергологија и туберкулоза.

наградата е потврда за повеќедецениската работа и ентузијазмот на многу генерации доктори во давање висококвалитетни здравствени услуги, смета Оливер Зафировски, директор на Институтот „Козле“, како и постојаната надградба на кадарот и големата меѓународна соработка. 

- Колегите кои работат во оваа установа со години се  посветени на својата работа во развој на одделенијата во кои веќе се началници. Сменивме неколку генерации, но квалитетот  на давањето здравствени услуги и покрај сите потешкотии  во земја како што е Македонија  останаа на високо ниво, изјавил  Зафировски. 

Наградата е и признание од голем број колеги надвор од Македонија  со кои со години соработуваат и на едукацијата во странство што веќе ја поминаа 25 проценти од лекарите од Институтот преку проектот на  Министерството за здравство.

- Наградата ни  овозможува широк контакт со многу институции од цел свет. Со неа сме на исто рамниште со сите клиники, секако не можеме во однос на буџетот  што го имаат останатите затоа што има клиники што даваат 50 милиони до 100 милиони  долари за научни програми. Но, благодарение на интернетот и се што е достапно нашата клиника ги воведе сите стандарди и протоколи  за лекување деца од областа на  пулмологија,  алергологија и туберкулоза, додаде тој.

Институтот „Козле“ во 1952 година почнал да работи како болница за детска туберкулоза, а 95 проценти од пациентите биле лекувани од тоа заболување.

Денес многу мал број пациенти се лекуваат од туберкулоза, а на најголем број им требаат здравствени услуги во областите пулмологија, алергологија, хронична патологија, малформации и се што е дел од педијатриската пулмологија.

Токму во „Козле“ се формирани првата интензивна нега на Балканот, како и првото одделение на  бронхоскопија од доајените во областа од кои учеле сегашните вработени. 

Во  Институтот „Козле“ работат 26  доктори специјалисти педијатри, по двајца ушни лекари и микробиолози, радиолози, како и 18 млади доктори  од кои голем дел се заминати на специјализација.

Годишно во „Козле“ болнички се лекуваат по 4.000  деца и се вршат 35.000 амбулантски прегледи. Институтот наскоро треба да добие нови простории за работа, за што на истата локација се во тек градежни активности.