Македонија и Албанија потпишаа договор за социјално осигурување

Договор за социјално осигурување денеска беше потпишан помеѓу Република Македонија и Албанија. Со овој договор ќе се регулираат односите во областа на социјалното осигурување помеѓу двете држави. Албанија е 22-та земја по ред со кои Македонија досега има потпишано таков договор.

Договорот го потпишаа македонскиот министер за труд и социјална политика Диме Спасов и неговиот албански колега Ерион Велиај.

-Преку примената на овој договор ќе се овозможи усогласување на националните законодавства, еднаков третман на лицата на кои се применува договорот, здравствена заштита, болест и мајчинство, упатување на лекување, собирање на периодите на осигурување, одредби за давање во натура кои произлегуваат од здравственото осигурување и заштита, парични давања и друго, истакна министерот Спасов.

Спасов посочи дека овој договор се однесува на лица, а не само на државјани на двете договорени старни и спаѓа во редот на таканаречените „отворени договори“.

Договорот содржи одредби за права од пензиското и инвалидското осигурување, здравственото осигурување, осигурување во случај на повреда на работа и професионална болест.

Албанскиот министер за социјална сигурност и млади Ерион Велиај истакна дека со овој договор ќе бидат опфатени околу 300.000 македонски и албански граѓани кои гравитираат во двете држави.

Тој додаде дека овој договор нема да биде симболичен акт туку од него ќе имаат корист самите граѓани.