Помош од 400.000 денари од Општина Карпош за поплавените подрачја

Советот на Општина Карпош денеска одобри 400.000 денари финансиска помош за подрачјата кои настрадаа во поплавите.

- Оваа одлука едногласно беше донесена на денешната 30-та седница на Советот на Карпош со која е одлучено 300.000 денари да бидат издвоени од Буџетот на Општината, а 100.000 денари се донација од советниците од сите советнички групи кои за оваа намена еднократно се откажаа од своите паушали, соопшти Општина Карпош. 

Од Општината претходно беше пратена и  донација во вода за пиење, конзервирана храна и средства за хигиена, кои граѓаните на Карпош ги донираа за поплавените во општината Чешиново-Облешево.

На дневен ред на седницата се усвоени и дваесетина извештаи за реализација на програмите на сите сектори во Општината во текот на минатата 2014 година, а е донесена и одлука за субвенционирање на енергетско ефикасни згради.

На денешната седница е одобрен и кварталниот извештај за извршување на Буџетот на општината, а советниците изгласаа и објектот во дворот на ООУ „Петар Поп Арсов“ да биде даден на приватен концесионер по економски цени на киријата, кој за возврат ќе изврши целосна реконструкција на градинката.