Именувани членови на собраниски тела, комисии и одбори
Собранието на Република Македонија во рамки на денешната 35. седница го усвои владиниот предлог, по скратена постапка да се донесат измените и дополнувањата на Законот за трансформација на претпријатијата со општествен капитал и на Законот за јавните претпријатија, пренесува МИА.
Целта на законските измени, како што рече министерот за економија Беким Незири, е подобро и потранспарентно работење на претпријатијата во општествена сопственост.
- Со предложените измени се дава и можност за продажба на јавните претпријатија кои треба да се приватизираат, истакна Незири.
Пратениците ги донесоа и предлог одлуките за разрешување и именување претседател и членови на одборите за доделување на државните награди „23 Октомври“, „11 Октомври“, „Мајка Тереза“ и „Св.Климент Охридски“.
Претседател на Одборот за доделување на наградата „11 Октомври“ ќе биде академик Катица Ќулавкова наместо досегашниот Митко Манџуков, а за наградата „23 октомври“ академик Вера Битракова - Грозданова наместо академик Владо Матевски. За наградата „Мајка Тереза“ досегашниот член на Одборот Андон Чибишев се разрешува и на негово место доаѓа д-р Оливер Зафировски, директор на Институтот за белодробни заболувања кај децата Козле, додека за наградата „Св.Климент Охридски“ на местото на досегашниот член на Одборот, поетот Никола Маџиров, доаѓа поетот и писател Јовица Тасевски Етернијан.
Пратеничката Солза Грчева го поздрави изборот на Ќулавкова за претседател на Одборот за наградата „11 октомври“.
- Се работи за личност со завидно интелеткуално и научно портфолио, која покажа дека работи независно. Верувам дека нејзините високи критериуми и објективноста ќе ги пренесе во работата на Одборот, нагласи Грчева.
Собранието на седницата за член на Комисијата на Агенцијата за електронски комуникации го именува Горан Велинов, д-р по информатички науки.
Беше усвоена и Одлуката за избор на претседател и членови на Државната комисија за одлучување во втор степен во областа на инспекцискиот надзор и прекршочната постапка на што реагираше Грчева.
Според неа, исклучително несериозно е за инспектори во втор степен да се именуваат лица на возраст од 28 и 30 години.
- Тие немаат доволно искуство и пред да се назначат на вакви функции, треба да се докажат во својата област, рече Грчева.
На тоа реплицираше претседателот на собраниската Комисија за прашања на изборите и именувањата Зоран Илиоски, нагласувајќи дека не гледа причина зотшо некој ако има 28 години, е стручен и ги исполнува законските критериуми, да не може да одлучува.
- Треба да им дадеме шанса на младите да се докажат во своето работење. Во спротивно, како ќе стекнат искуство, додаде Илиоски.
Пратениците во рамки на седницата се изјаснија и за неколку предлог одлуки за избор на членови на повеќе собраниски тела.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа