Зимата ќе трае уште 6 недели, предвиде мрмотот Фил

Мрмотот Фил, најпознатото животно претскажувач на времето во светот, излезе од својата дупка и даде одговор на прашањето кои многумина со нетрпение го очекуваат.

Според Фил, не` очекуваат уште шест недели зима.

Легендата вели дека ако мрмотот погледне во својата сенка на 2 февруари, зимата ќе трае уште шест недели, а ако не го стори тоа пролетното потопло време ќе дојде порано.

Секоја година на 2 февруари американското градче Панксатони со 5.500 жители, станува центар во кој се собираат туристи од сите делови на САД, за да бидат сведоци на уште едно предвидување на најпознатиот временски прогнозер на светот. 

Иако Фил и неговите претходници во изминатите 129 години само 17 пати точно го предвиделе траењето на зимата, ова случување во градот привлекува околу 30.000 луѓе и носи околу милион долари приход, а на тој ден не работата ни училиштата со цел децата да можат да одат до јамата на Фил во Гоблерс Кноб.