Вељаноски-Мета: Македонија и Албанија се пријателски земји и природни партнери за соработка
Македонија и Албанија се две соседни пријателски земји, со добри односи кои имаат тренд на нагорна линија. Потребно е продлабочување на соработката за која се природни парнери особено во делот на регионалните проекти, оценија денеска претседателите на македонскиот и албанскиот Парламент Трајко Вељаноски и Илир Мета, по нивната денешна средба во Скопје.
- Разговорите беа отворени со заемно почитување како што доликува на добри соседи, на два народи со богата историја и заедничка евроатланска перспектива. Наша заедничка оценка е дека билатералните односи помеѓу двете држави се добри и одат во нагорна линија, истакна Вељаноски.
Додаде дека е потребно натамошно развивање на и онака континуираната парламентарна соработка која, како што рече, дава голем придонес во целокупните билатерални односи.
- Добивањето кандидатски статус на Албанија за членство во Европската унија отвора многу можности за заеднички настап и користење на средствата од ИПА фондовите, кога станува збор за големи инераструктурни проекти кои се значајни за двете држави, регионот и пошироко, истакна претседателот на македонското Собрание.
На потребата за зголемување на соработката меѓу двете земји посочи и неговиот албански колега Мета.
- Решителни сме да ја зголемиме соработката меѓу двете земји и двата Парламенти бидејќи таа соработка ќе послужи за зголемување на квалитетот на соработката меѓу двете влади во Тирана и Скопје во функција на зголемување на благосостојбата и економскиот и социјалниот развој. Македонија не е само наш сосед, туку и природен партнер за реализација на регионални проекти и во овие рамки двете земји треба да работат уште повеќе за да се конкретизираат и повеќекратно да се зголемат заедничките проекти и трговската размена на двете земји за напредокот на нашите граѓани, рече Мета.
Во оваа насока, додаде тој, треба да се забрзааат напорите за градење на железничката линија меѓу Скопје и Драч што, како што посочи, претставува значаен дел од Коридорот 8, кој е од стратешко значење и итност за двете земји.
На средбата на претседателите на албанскиот и македонскиот Парламент станало збор и за положбата на етничките заедици.
- Македонија доследно работи и ќе работи на остварување на Охридскиот договор. Ние сме мултиетничко, мултикултурно и мултиконфесионално општество. Овој договор обезбедува доследно почитување и развивање на индивидуалните и колективните права на етничките права на етничките заедници, но не задира во унитарниот карактер на државата. Во таа смисла очекуваме и нашите соседи доследно да ги почитуваат колективните и малциски права на своите граѓани, вклучувајќи ги и македонците кои живеат таму, рече Вељаноски.
Неговиот колега Мета посочи дека Албанија била секогаш отворена и водела сметка за правата на малцинствата, вклучително и македонското, во насока на, како што рече, поддршка за зачувување на нивната култура, јазик и традиција, но и за создавање колку е можно подобри услови за нивно успешно интегрирање во економскиот, институционалниот, политичкиот и општествениот живот во оваа земја.
- Ние не велиме дека сме совршена земја. Земја сме која треба да изоди уште пат за членство во ЕУ и да направи уште многу во сферата на почитување на правата на етничките заедници, но имаме и волја да го направиме, рече Мета.
Во таа насока, посочи и на тоа што општина Пустец во која живеат Македонци, наскоро ќе стане еден од 61-те окрузи во Албанија.
- Иако таа е најмала по број на жители, тоа е во знак на почит и признавање на оваа заедница во Албанија, со цел таа и натаму да ги чува и развива своите карактеристики, рече Мета.
На средбата станало збор и за евроатланските процеси, при што Мета посочил оти Албанија и натаму ќе ја поддршува Македонија на патот на членството во НАТО, а македонскиот Парламент покажал подготвеност за споделување на искуствата во насока на усогласување на законодствството со она на ЕУ.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа