Неколку штипски населби добија нови улици

Сопствениците на индивидуалните куќи кои пред извесно време ги легализираа или постапката им е во тек ги чекаат табличките со броеви и имињата на улиците. Портпаролот на Општина Штип, Драган Ристов вели дека екипи на Општина Штип работата на нов регистер на броеви и на улици во штипските населби Дузлачки рид, Железничка, Косовска, Радански пат и Балканска.

- Кога ќе биде направен целиот тој нов регистер со броевите на улиците ќе биде доставен до Централен регистер, по што општината кога ќе пристигнат табличките со броевите на куќите ќе ги информира граѓаните да дојдат да си ги подигнат, вели Ристов.

Додаде дека во Штип има 29 нови улици и тоа таму каде што со години граѓаните кои имаат дивоградби немаа адреса на живеење, со што семејствата беа принудени личните документи да им бидат на улици на нивни роднини или пријатели.

Новите таблички на кои ќе бидат запишани броевите и улицата се очекува да чинат од 300 до 400 денари, а на секоја куќа ќе мора да биде ставена на видно место согласно законската процедура.