Болницата во Прилеп ќе биде реконструирана до крајот на септември 2016

Пратениците денес на седницата посветена на пратеничките прашања ја искористија можноста директно да ги побараат одговорите од претседателот на Владата и министрите за прашањата произлезени од средбите со граѓаните низ целата Македонија.

Пратеничката од ВМРО-ДПМНЕ Ане Лашкоска побара одговор од премиерот Никола Груевски кога се планира да започне изградбата на инфраструктурата во зоната во Прилеп и фабриката и со која динамика би се одвивала.

Груевски потенцираше дека компанијата Гентерм како што има најавено планира да започне со изградба во средината на месец март и до крајот на октомври фабриката да биде завршена. Исто така паралелно со фабриката ќе се доградува и зоната која што веќе е во процес на изградба. „Гентерм“ планира да вработи 2000 луѓе од кои 1000 во првите две години.

Во врска со реконструкцијата на прилепската болница, заменик министерот за здравство Јовица Андовски посочи дека веќе е направена обиколка со стручен тим од архитекти за да се изврши потребната реконструкција. Конкретно за прилепската болница како што нагласи заменик министерот се планира комплетна реконструкција на операционите сали, на сите тоалети и подот во целата болница. Реконструкцијата на болницата би изнесувала околу 40 милиони денари и се планира да заврши до крајот на септември 2016 година.

Министерот за земјоделство Михаил Цветков, во врска со договорите за откуп на тутунот, информираше дека според последните информации досега откупени се 3 милиони и 300 килограми тутун во просечна цена од околу 121 денар.

Цветков нагласи дека преку инспекторите се превземени сите мерки за успешно спроведување на откупот, па се очекува проблемите да бидат евидентирани и решавани од страна на инспекциските служби кои што се задолжени за тоа. Од девет откупни претпријатија две сеуште немаат започнато со откуп на тутун и се очекува во најскоро време и овие претпријатија ќе отпочнат со откупот.