Иванов: Неопходна е нова етапа со конкретни проекти во регионалната соработка

Претседателот на Република Македонија Ѓорге Иванов на денешната работна средба со шефовите на Дипломатско-конзуларните претставништва во странство, истакна дека следната година клучна задача ќе имаат македонските амбасадори во непосредното соседство и оти е дојдено време за нова етапа и конкретни проекти во регионалната соработка.  

На годишната средба во МНР, прва во неговиот втор мандат, претседателот Иванов повика на проактивност и засилен ангажман на шефовите на дипломатско-конзуларните претставништва, во насока на реализација на поставените стратешки цели во надворешната политика, како што се евроатлантските интеграции, добрососедските односи, регионалната соработка, отвореноста кон сите со зајакнување на постоечките и создавање нови пријателства и партнерства, ангажман на мултилатерален план, економската и јавната дипломатија.

- Нашата дипломатија мора да биде во тек со промените во светот, а и самите знаете дека само во 2014 година бевме сведоци на тектонски поместувања на политичката сцена на глобално ниво, истакна Иванов.

Клучна задача, според шефот на македонската држава, ќе имаат амбасадорите во непосредното соседство.

- За следната година сметам дека клучна задача ќе имаат амбасадорите на нашата држава во непосредното соседство. Од нив очекувам зголемување на активностите за соработка. Нашиот регион излезе од мачното минато, почна период на градење доверба, но забавеното темпо на интеграциите создаде нова реалност и ново прекршување на интересите на Балканот, рече Иванов.

Во ваква ситуација, посочи тој, ние во регионот мора меѓусебно максимално да соработуваме во сите сфери од заеднички интерес.

- На сите регионални собири инсистирам дека дојде време кога декларативноста во регионалните односи мора да ја испратиме во историјата. Неопходна е нова етапа, со нови потреби, за конкретни проекти во регионалната соработка, рече претседателот Иванов, дополнувајќи дека следната година планира реализација на негови официјални посети на Албанија, Косово, Црна Гора, Хрватска, Словенија, како и на размени на посети со Босна и Херцеговина и Бугарија.

Претседателот Иванов изрази надеж дека со новиот грчки претседател ќе има позитивно поместување во билатералните односи.

Посочи дека членството на Република Македонија во Европската унија и во НАТО останува врвен приоритет.

- Иако не дојде до ефектуирање на препораката и добивање датум за преговори, како и секогаш, наша заедничка задача е да продолжиме со несмалено темпо да работиме на евро-атлантската агенда на Република Македонија, рече македонскиот претседател пред шефовите на дипломатско-конзуларните претставништва.

Иванов од македонските дипломати побара максимална посветеност и на економската, јавната и културната дипломатија.

- Потребна е поголема заложба на македонската дипломатија во насока на обединување на дијаспората и надминување на проблемите со кои се соочуваат, рече македонскиот претседател.

Претседателот Ѓорге Иванов побара посебно внимание и ангажман да биде посветен и на положбата на македонското национално малцинство во одредени земји каде што тоа е во незавидна положба.