Половина од Чесите се незадоволни од претседателот Земан

По само 100 дена од стапувањето на функцијата на чешкиот претседател Милош Земан, речиси половина од граѓаните не се задоволни од неговата работа, јави дописникот на МИА од Прага.

Според истражувањето на СТЕМ/МАРК, анкетираните го оценувале претседателот како во училиште и тој не добил ниедна оценка повисока од четворка. Најдобра просечна оценка, Земан добил за употреба на претседателските овластувања, додека најниска за репрезентирање во јавноста.

Во врска со неодамнешната случка, кога при отворање на Изложба на кралски накит се шпекулираше дека Земан кој едвај се држеше на нозе е пијан, а од Кабинетот изјавија дека имал вироза, три четвртини од Чесите не веруваат во објаснувањето.

Со работата на претседателот се задоволни 47 процент од населението и тоа особено луѓе постари од 60 години, со пониско образование, од помалите градови и општини. Иако е голем процентот на луѓето кои го оценуваат делувањето на Земан негативно, сепак мнозинството му посакува да остане и да го оствар целиот петгодишен мандат.

Аналитичарите коментираат дека луѓето ги интересира како ќе се одвива мандатот на Земан. - Јавноста оценува дека со претседателот, да се изразам вулгарно е забавно, вели директорот на агенцијата, Јан Тучек.

Во споредба со неговиот претходник Вацлав Клаус, Земан го преферираат само 20 проценти, а за Клаус речиси двојно повеќе, 38 проценти сметаат дека бил подобар шеф на државата. 

најчитано сега