Груевски донираше за храмот „Св.Константин и Елена“: Сега е времето на нашата мисија
Членови на Владата и на Собранието, градоначалници, претставници на академската и бизнис заедницата, владици од Македонската православна црква- Охридска архиепископија, денеска учествуваа на донаторска конференција за доизградба на црквата „Св. Константин и Елена“ во Скопје, чие возобновување со повторна изградба почна пред две години.
Црквата „Св. Константин и Елена“, е изградена во 1927 година, но како и повеќе други храмови и објекти е урната во тек на земјотресот во 1963 година.
Премиерот Никола Груевски и поглаворот на МПЦ г.г. Стефан, упатија апел за донации со кои ќе се комплетира храмот.
- Да ја продолжиме убавата градителска традиција во Македонија. Да го продолжиме она што го правеле нашите предци и да го дозавршиме она што го почнавме во 2012 година. Со нашето дело, ќе придонесеме и за Македонска православна црква - Охридска архиепископија, која е нашата вековна духовна мајка и столб на нашата државност, закрила на народната побожност и артикулатор на јавниот морал на денешните и идните генерации. Ќе помогнеме со уште едно велелепно светилиште да се даде придонес во одбраната на семејството од некои искривоколчени вредности, кои некои ни ги промовираат и од нападот кон традиционалните и морални вредности кои ги одржале нашите семејства и народ дури и во миговите на најголеми искушенија и загрозувања. Сега е времето на нашата мисија, истакна премиерот Груевски.
Време, додаде, во кое нашиот народ се соочува со бројни предизвици меѓу кои можеби најголемата е демографијата и рецесијата на нацијата, но и време кога можеме да дадеме одговори и тоа токму со нашите сопствени дела.
- Секој од нас кој верува во Бог веќе има изградено божји храм во својата душа и секој од нас којшто може треба да се потруди да смогне сили да помогне некој постоечки храм или да учествува во создавањето нов, овој пат не духовен, туку и материјален, и не само за себе каков што е оној во душата туку за народот исто како што создавал и Свети Климент и нашите предци, додаде Груевски.
Поглаварот на МПЦ-ОА нагласи дека споменот по урнатите храмови и мислите и желбата за нивна обнова никогаш не се престанати. Во изминатите две години за обновата на „Св. Константин и Елена“, како што рече, е направено многу и храмот и камбанаријата се во завидна градежна фаза. Храмот се обѕидува и од надворешната и од внатрешната страна, камбаните се веќе готови и изработени во леарницата во Инсбрук, Австрија.
- Самиот пак храм од аспект на архитектурата, со предвиденото внатрешно и надворешно уредување ќе биде храм- ремек дело во современото сакралноградежништво, во која до детали е запазена православната традиција и верувам дека ќе биде храм гордост за Скопје и за цела Македонија. Ќе биде споменик и ќе сведочи дека овде од секогаш и се сакало и се знаело како да се гради за бога и неговите светии, истакна Г.Г. Стефан.
Архиепископот охридски и македонски нагласи дека е добро што и оваа генерација продолжува да возобновува храмови и оти и покрај економските состојби секоја епархија е на некој начин градилиште.
- Очигледно духовните потреби и традицијата да издвојуваме за Бога и кога за себе немаме одповеќе придонесуваат и оваа генерација да ја красат бројни ктиторски и неимарски тајфи. И да не заборавиме, колку сме поблиски до Бога, толку стануваме и меѓусебно поблиски едни со други. Градбите за Бога градат од нас подобри луѓе и вградуваат во нас и богољубие и човекољубие, рече г.г. Стефан.
Донаторската конференција за обнова на црквата е во организација на Фондацијата „Св. Константин и Елена“. Со изградбата на црквата „Св.Константин и Елена“ Македонија ја одбележува и 1700-годишнината од втемелувањето на православието и потпишувањето на Миланскиот едикт, кој бил потпишан токму од Св. Цар Константин.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа