Во Њујорк протести поради убиството на Афроамериканецот Ерик Гарнер

Илјадници лица излегоа на улиците на Њујорк и го затворија вчера Бруклинскиот мост, осудувајќи го убиството на Афроамериканецот Ерик Гарнер, како и поради одлуката на големата порота за непокренување обвинение против полицаецот белец, кој е одговорен за смртта на Гарнер.

Ова е втора ноќ жителите на Њујорк да протестираат поради смртта на Гарнер, невооружен Афроамерикенц, кој за веме на апсењето во јули во Њујорк почина, откако полицијата го соборила на асфалт, а еден од полицајците го пристискал во пределот кај вратот и главата. 

Демонстрантите извикувале пароли против полицијата и носеле транспаренти на кои било испишано: „Расизмот убива“ и „Црниот живот е важен“. 

Друга група демонстранти марширале преку Бруклинскиот мост, со црн транспарент, на кој пишуваше „Ова престанува денеска“ и носеа десет црни ковчези со испишани имиња на луѓе, кои биле убиени од полицијата. 

Во меѓувреме е покрената федерална истрага во врска со смртта на Гарнер, татко на шест деца, кого полицијата сакала да го уапси, бидејќи нелегално продавал цигари на улиците на Њујорк.