Српскиот министер Антиќ не е повреден откако парче мраз му падна на главата

Српскиот министер за рударство и енергетика Александар Антиќ помина неповреден во незгодата кога парче мраз му падна врз глава при посетата на Мајданпек, јави Танјуг. 

На Антиќ, кој врз главата имаше заштитен шлем, парчето мраз ненадејно му падна врз главата при давање изјави за медиумите, по посетата на енергетските постројки во Мајданпек.

Од ударот на мразот заштитниот шлем на главата на министерот пукна, но тој не е повреден.

Антиќ по инцидентот продолжил со работните активности.

Мајданпек во изминатите денови го погоди силно невреме, проследено со силен ветер и смрзнат дожд, од кој преносно електроенергетскиот систем доживеа хаварија, а градот и натаму нема струја.