Груевски го честита Денот на албанската азбука: Ја негуваме толеранцијата и меѓусебното почитување

Премиерот Никола Груевски денеска  упати честитка до припадниците на албанската етничка заедница во Република Македонија по повод 22 Ноември – Денот на албанската азбука.

- Унифицирањето и создавањето на модерна азбука преставува значаен чекор кон писмениот и културен развој. Тоа е и клучот за развој и растеж во сите процеси, културни, економски, политички и општествени. Денешниот празник е значаен ден за сите припадници на албанската етничка заедница во Република Македонија, но и неговото одбележување е значајно за развој на мултиетничноста и негувањето на таквите вредности, вели македонскиот премиер во честитката.

Во неа тој додава дека преку нивното празнување ја негуваме толеранцијата, го валоризираме меѓусебното почитување кое како држава ни е значајно, а, како што потенцира, споделувајќи ги особеностите на заедниците ние создаваме модел кој треба да биде пример како по својата уникатност така и по неговите карактеристики на заеднички соживот, почитта, и традицијата на меѓусебно разбирање.

- Таквите вредности треба да се длабоко вкоренети меѓу граѓаните и нераскинлив дел од постоењето на Република Македонија. И затоа како ќе се однесуваме кон овие прашања зависи и каква иднина ќе градиме. Тоа се заеднички вредности кои треба да се предност на нашето општество и стимул со заеднички сили да продолжиме да работиме за доброто на нашата држава, да продолжиме со напорите за обезбедување на услови за раст и развој и унапредување на стандардот на граѓаните, вели премиерот Груевски во честитката до припадниците на албанската заедница.

Обединувањето кон овие важни теми дава дополнителна енергија и сум убеден, вели Груевски, дека само така можеме да постигнеме многу повеќе за нашата заедничка држава Република Македонија. 

 

 

Оцени ја веста

21.11.2014 - 14:04

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега