Промоција на проектот Еко пакет Македонија

Промотивен ден на проектот Еко пакет Македонија ќе се одржи денеска во Скопје во организација на ОХО-Асоцијацијата за едукација.

Овој проект се реализира веќе девет години во мрежата на еко училишта во Словенија, Хрватска и Србија. Од оваа година по првпат проектот Еко пакет ќе се реализира и во Македонија, првично како проект за основните еко училишта со зелено знаме (29 основни училишта), а од следните учебни години и за детските еко градинки и средните еко училишта.

Проектот Еко пакет е наменет за развивање на свеста и значењето на одговорното однесување кај децата, учениците, всопитувачите, наставниците и родителите, преку собирање, селектирање, одвојување и отстранување на картонот од употребената Тетра Пак амбалажа од млекото, јогуртот и соковите.

ОХО како национален оператор на интернационалната програма Еко училиште на светската Фондација за еколошка едукација континуирано работи на обезбедување поддржувачи и партнери на националната мрежа на еко училишта. Прв пат во учебната 2014/2015 година како нов партнер го имаат Тетра Пак со регионалниот проект Еко пакет.

Република Македонија е меѓу ретките држави во светот (покрај Шкотска) каде порграмата Еко училиште се реализра на национално ниво во сите градинки и училишта преку Министерството за образование и наука, како дел од едукативната програма „Интеграција на еколошката едукација во македонскиот образовен систем“.