Собранието ќе ја оддржи 17.седница

Собранието на Република Македонија денеска ќе ја одржи 17-тата седница на чиј денвен ред. меѓу другите, е законот за изменување и дополнување на Законот за биомедицинско потпомогнато оплодување, во второ читање.

На дневниот ред на седницата се и дополнетите предлози на законот за заштита и благосостојба на животните, на законот за изменување и дополнување на Законот за територијалната организација на локалната самоуправа во Република Македонија, двата во второ читање и Предлог законот за ратификација на Договорот за изменување и дополнување на Договорот за социјално осигурување помеѓу Република Македонија и Република Словенија.

Пратениците треба да ги разгледаат и Предлог законот за изменување и дополнување на Законот за заштита на населението од заразни болести, во вторo читање, Барањето за давање на автентично толкување на член 79 став 1 од Законот за градење, поднесено од градоначалникот на општина Охрид, и Предлог одлуката за дополнување на Одлуката за избор на претседатели, заменици на претседателите, членови и нивни заменици на комисиите на Собранието на Република Македонија.

Ќе се расправа и за Предлог одлуката за дополнување на Одлуката за основање на претенички групи на Собранието на Република Македонија за соработка со парламенти на други држави и избор на претседатели и членови на пратеничките групи на Собранието на Република Македонија за соработка со парламенти на други држави.

Во рамки на дневниот ред на 17-тата седница се и Дополнетиот предлог на закон за изменување и дополнување на Законот за градење во второ читање, предлог законите за изменување и дополнување на Законот за тутун и тутунски производи, по скратена постапка и на Законот за здравјето на растенијата, на Законот за пожарникарството, и на Законот за безбедност и здравје при работа, трите во прво читање, како и Барањето за давање автентично толкување на член 137 ставови 3 и 4 од Законот за авторското право и сродните права, поднесено од пратеникот Антонијо Милошоски.