Легендарниот Larry McCray Band на „Blues & Soul Festival 2014"

Во Универзалната сала во Скопје вечер со концерт на легендарниот Larry McCray Band од САД почнува „Blues & Soul Festival 2014“.

„Blues & Soul Festival 2014“ е во организација на Дирекција за култура и уметност - Скопје

Larry McCray во моментов е едно од најголемите имиња на светската блуз сцена и редовен учесник на најреномираните светски фестивали во САД и Европа. Неговиот динамичен сценски настап и виртуозност, комбинирано со извонредниот вокал е вистинската состојка, барана на секој фестивал во светот.

Роден во семејство на музичари. Со својот талент тој едноставно бил предодреден за музичка кариера која го донесе до самиот врв. Според него, во создавањето сопствен музички израз, најголемо влијание имале тројцата кралеви B.B., Albert и Freddie, потоа Albert Collins, Elmore James и Magic Sam кои секој на свој начин оставија голема трага во блузот.

Дискографскиот опус на Larry McCray содржи осум албуми, како и бројни снимки на кои тој се појавува како гостин на познати имиња, како на пример „Judgement Day: Songs Of Robert Johnson“ (Otis Clay, Joanna Connor, Carl Weathersby, Billy Branch…) или албумот посветен на музиката на Bob Dylan: „This Ain’t No Tribute“ (Alvin Youngblood Hart, Taj Mahal, Mavis Staples, Isaac Hayes, John Hammond…), потоа „All Blues’d Up-Songs Of Eric Clapton“ (Buddy Guy, Bo Diddley, Otis Rush)...

Како еден од своите врвови во кариерата тој го смета признанието на Orville Gibson Guitars за најдобар блуз гитарист во 2000 година, кога беа номинирани гитаристи од калибарот на Jeff Beck, Eric Clapton...

Деновиве се очекува да излезе неговиот најнов албум на кој како специјален гостин се појавува Derek Trucks (Allman Brothers), еден од најдобрите гитаристи на денешницата.