Генералот Џон Ален именуван за командант на новата коалиција против ИД

Американскиот генерал Џон Ален е именуван да командува со новосоздадената меѓународна коалиција за борба против исламистичката милитантна група Исламска држава (ИД).

Коалицијата ја предводи САД, а во неа се вклучени и десет арапски земји кои ќе им помагаат на американските сили во воздушните напади врз позициите на ИД во Ирак, но и во Сирија.

Според планот на американскиот претседател Барак Обама, што тој го обелодени пред два дена, со заедничката воена операција треба да се деградира и уништи ИД, а во исто време, да им се помогне на сојузниците кои веќе се вклучени во борбените дејствија против припадниците на оваа џихадистичка група.

Обама, првпат одобри воздушни напади врз ИД и на сириската територија, иако официјален Вашингтон, во меѓувреме, соопшти дека таквите напади ќе се извршуваат без комуникација и подршка на властите во Дамаск и на претседателот Башар ал Асад.

Русија и Сирија вчера остро реагираа на ваквиот план на претседателот Обама, оценувајќи дека нападите врз сириската територија без согласност на властите во Дамаск се „тешка повреда на меѓународното право“ и акт на „агресија“ врз една суверена земја.

Американската најава за бомбардирање на Сирија, меѓутоа, беше поздравена и подржана од сириските бунтовници кои до пред неколку месеци војуваа заедно со припадниците на ИД.