Заштедени 6 милиони евра со паралениот увоз на лекови - набавката ќе продолжи

Речиси шест милиони евра се заштедени со централизираната набавка на лекови за јавните здравствени установи овозможена преку паралелниот увоз на лекови. Најголема заштеда од над два милиона евра на годишно ниво има кај лекот што се користи кај пациенти болни од леукемија, а значителна заштеда од приближно 813 илјади евра е постигната и кај лек што се користи како раствор за инектирање кај пациенти болни од карцином.

За ова денеска информираше министерот за здравство, Никола Тодоров.

- На Универзитетската клиника за хематологија претходно овој лек се набавувал за 3.149 денари, а со централизираната набавка со овозможен паралелен увоз лекот е набавен за 198 денари. На Универзитетската клиника за онкологија и радиотерапија лекот се набавувал за 32.621 денар, а сега за 25.096 денари, посочи Тодоров.  

Заштеда од над 300 илјади евра на годишно ниво има и кај лекот со генерика „capecitabine“ кој се користи во онкологијата, а чија потрошувачка на годишно ниво е над 654 илјади таблети.

Министерството за здравство најави дека ќе продолжи со централизираната набавка на лекови.

- Подготвуваме огромна набавка за околу 700 лекови за кои очекуваме тендерот да биде распишан на почетокот на септември. И за нив очекуваме сериозна заштеда. Се планира двегодишна набавка, односно за 2015 и 2016 година, појасни министерот Тодоров.