Школа за млади лидери на Иванов во Охрид

Вкупно 40 учесници и 20 предавачи од Македонија, Европa, САД, Канада и Кина ќе бидат дел од Школата за млади лидери, што по иницијатива на Претседателот на Република Македонија, д-р Ѓорге Иванов, годинава по петти пат ќе се одржи од 19 до 28 август во Охрид.

Идејата на Школата е да им се овозможи на младите, талентирани и амбициозни луѓе од Македонија да ги надградуваат и усовршуваат своите вештини, да ја развиваат својата креативност и лидерски способности.

Програмата опфаќа предавања и обуки од сферите на лидерството и менаџментот од страна на еминентни предавачи и гости од врвни образовни и професионални институции, менаџмент-симулации и практични лидерски вежби.

Целта на оваа школа е, пред сè, да се стимулираат позитивните вредности кај младите лидери и идни политички, културни и економски предводници на нашата земја.

„Преку Школата за млади лидери инвестираме во знаењето на секој еден млад учесник на школата, но нашата крајна цел е да се развие оној тимски и лидерски дух и тимското во лидерството. Секој тим кога добива, кога победува, победува заради тоа што во него имаме концентрација на знаење, имаме концентрација на енергија, имаме концентрација на мотивација, имаме луѓе во тимот со различен бекграунд, со различни таленти. Сакаме да инвестираме во лидерите поединечно, но многу е важно да работиме и на тимскиот дух кај нив. Тоа несомнено носи позитивни вредности", вели д-р Гордица Каранфиловска, раководител на проектот.

Меѓу предавачите на годинешната Школа за млади лидери се поранешниот српски претседател, Борис Тадиќ, канадскиот сенатор, Доналд Мередит, потпретседателот на кинескиот телекомуникациски гигант ZTE, Ксиао Минг, основачот на Пи Ворлд, Коста Петров, австрискиот престолонаследник, надвојводата Карл фон Хабсбург, директорот на компанијата за јавни комуникации Расел од САД, Џејсон Мико, поранешниот приватен секретар на принцезата Дијана, Патрик Џефсон, асистентот на поранешниот американски претседател Роналд Реган, Мери Џо Џејкоби, директорот на Мултимод групацијата, Тафшир Авал, правникот Мухамед Мешиќ од БиХ, познат по своето познавање на над 70 светски јазици.

Во изминатите четири години на Школата учествуваа 150 млади луѓе и над 100 предавачи, меѓу кои амбасадори, функционери од Европската Унија, директори на меѓународни институти и успешни бизнис компании, професори од реномирани светски универзитети.

Учесниците на досегашните школи се организирани во Алумни асоцијација – ИСЛАА, регистрирана како посебно здружение, каде преку организација на семинари, панел дискусии, предавања, средби со амбасадори, учество во младински настани, продолжува развојот на знаењата и вештините на досегашните учесници на школата.

16.08.2014 - 12:49
 
 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега