Славниот актер се самоубил? - еве ги деталите за трагедијата

Славниот холивудски глумец, 63 - годишниот Робин Вилијамс, пронајден е мртов во својот стан во Северна Калифорнија.

Безживотното тело на актерот, пронајдено е вчера, околу пладне, во неговиот семеен дом. Последен пат бил виден жив околу 10 часот, по локално време.

Според првичните извештаи станува збор за самоубиство, но сепак и официјалната истрага ќе треба да го потврди тоа.

- Се бореше со сериозна депресија, изјави Мара Баксбаум, неговиот претставник за печат.

Американските медиуми пишуваат дека причина за смртта е гушење, но полицијата и натаму ги испитува околностите во кои починал глумецот.

- Ова е трагичен и ненадеен губиток. Семејството моли за почитување на приватноста во овие тажни моменти, истакна Баксбаум.

Неодамна славниот актер Робин Вилијамс се лекуваше од зависност од кокаин и од алкохол. Тој минатиот месец се пријави на рехабилитација во клиника во Минесота, каде што мина неколку недели.

Робин Вилијамс е роден на 21 јули 1951 и познат американски глумец, како и актер кој го позајмуваше својот глас во многу познати цртани филмови, како и стендап комичар.

Славата ја стекна со улогата на вонземјанецот Морк во телевизиската серија Морк и Минди. Неговата филмска кариера ги вклучува добро прочуените филмовите како што се „Добро утро, Виетнам“, „Друштвото на мртвите поети“, „Будења“, „Кралот на рибарите“ и „Добриот Вил Хантинг“, како и финансиски успешните „Попај“, „Кука“, „Аладин“, „Госпоѓа Даутфаер“, „Џуманџи“, „Кафез“, „Ноќ во музејот“ и „Среќни стапала“.

Иако беше номиниран три пати за Оскар за најдобар глумец, Вилијамс доби оскар за најдобар спореден глумец во „Добриот Вил Хантинг“ во 1997 година. Исто така доби две награди „Еми“, четири Златни Глобуси и пет награди „Греми“ (Grammy Awards).

Имаше три брака зад себе, и три деца со првите две сопруги.