Дик Марти: Извештајот на Вилијамсон за воените злосторства во Косово изненадување за Западот

 

Поранешниот известувач на Советот на Европа, Дик Марти, денеска изјави дека извештајот на обвинителот Клинт Вилијамсон за извршени воени злосторства во Косово, претставува изненадување за западните Влади.

Во интервју за швајцарското национално радио, Марти рече дека извештајот на Вилијамсон за работата на специјалниот истражен тим за трговијата со човечки органи во Косово во 1999 година, што беше објавен вчера, претставува пријатно изненадување.

Тој истакна дека пред три години, кога тимот на Вилијамсон ја почна својата истрага, никој не верувал дека тој ќе открие нешто и никој не ни помислувал оти ќе биде формиран специјален суд за воените злосторства во Косово.

- Вилијамсон зборуваше за злосторства против човештвото, знаејќи што се подразбира под таа формулација, изјави Марти, додавајќи дека било многу тешко да се изнесат докази, затоа што сведоците немаат доверба во косовското и во меѓународното правосудство, честопати биле заплашувани, а некои од нив и исчезнале.

Марти го сподели оптимизмот на Вилијамсон за тоа дека ќе бидат најдени докази за трговијата со човечки органи. 

Тимот на Вилијамсон беше формиран во 2011 година за да спроведе независна истрага за тврдењата во извештајот на Дик Марти пред Советот на Европа дека имало трговијата со човечки органи во Косово во 1999 и 2000 година. Марти во својот извештај обвини неколку поранешни команданти на Ослободителната војска на Косово (ОВК), вклучувајќи го и косовскиот премиер Хашим Тачи, дека се одговорни за грабнувања и убиствата на стотици цивили Срби, Роми и „нелојални“ Албанци, од кои некои биле одведени во т.н. „жолта куќа“ во Албанија, каде им биле вадени органите и потоа продавани на црниот пазар.

Вилијамсон изјави дека не се откриени доволно докази за покренување обвиненија за трговијата со органи, но дека има докази за воени злосторства.

- Тој зборуваше за злосторства против човештвото, за измачувања. Јас никогаш во преден план не ја ставав трговијата со органи. Зборував за некои случаи, а Вилијасон дојде до истиот резултат, рече Марти.

И покрај тоа што Вилијасон не спомена никакви имиња, Марти потенцира дека за него е јасно кој е виновен за злосторствата.

- Досега врските меѓу високата политика и организираниот криминал (во Косово) беа толку големи што не можеше да се изгради една нормална власт, а голема одговорност за тоа им и меѓународната заедница, изјави Марти.

30.07.2014 - 14:05
 
 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега