Денеска започнуваме со три вредни, значајни инфрастрктурни проекти за Кочани, проекти со кои ќе го смениме ликот на Кочани. Тоа е изградба на влезниот булевар, понатаму изградба на мост на Кочанска река и проект за изградба на цевковод со кој ќе овозможиме чиста вода за пиење за поголем дел од градот, изјави заменик претседателот на Владата, Александар Николоски, кој заедно со претседателот на Владата, Христијан Мицкоски и градоначалникот Владко Грозданов, означија почеток на градежните работи на овие три проекти.
Инвестициите во инфраструктурни проекти само од Министерството за транспорт се движат околу 5,5 милиони евра, истакна вицепремиерот Николоски.
Во продолжение интегралната изјава на вицепремиерот Николоски:
“Навистина ми е драго што денес сме во Кочани за да започнеме три големи проекти кои што се значат многу за градот, за целата општина, за подршка. Почнуваме со реализација на влезниот булевар, кој што е проценета вредност околу 2 милиони евра и очекуваме во наредните година и половина да биде завршен. Понатаму мост на Кочанска река со вредност од некаде околу 350.000 евра и она што долго време се очекуваше, проект кој што е започнат уште во 2013 година, тоа е довршување на водоводот со изработка на еден потисен цевковод кој што треба да овозможи чиста вода за пиење за поголем дел од градот, кој што е вредност некаде околу 1.100.000 евра и исто така очекуваме за една година да биде завршен.
Значи ова се вкупно три проекти што ги почнуваме денес и кои што очекуваме со предвидена динамика во соработка со општината да ги завршиме. На тоа се работат уште три проекти кои што одат исто така со заем од Светска банка преку Министерството за транспорт. Два се веќе завршени, еден се работи во вкупна вредност се околу 550.000 евра, кога ќе се собере се заедно доаѓа една инвестиција од околу 4 милиони евра кои што се дополнителни средства на оние средства кои што редовно ги добиваат општините како поддршка.
Таа поддршка беше 250 милиони евра за минатата година и 100 милиони евра за предходната година. Во рамките на таа поддршка веќе се работи другиот булевар во вредност од некаде околу милион и половина и таму интензивно одат активностите со кога ќе се собере се зборуваме за вредност од 5,5 милиони евра средства кои што се инвестираат само во инфраструктура, што се надеваме дека целосно ќе го промени ликот на градот и на општината и остануваме посветени и во следниот период да работиме заедно со општината.
На дневна основа сме во координација и сакам да се заблагодарам на градоначалникот и сакам да се заблагодарам лично на председателот на Владата, на премиерот Мицкоски за тоа што на дневна основа Кочани е приоритет и така и ќе остане во следниот период” – изјави вицепремиерот Николоски.