Вечерва потпретседателот на ВМРО-ДПМНЕ, Александар Николоски, престојуваше во дојранското село Николиќ, каде што оствари средба со жителите и најави неколку значајни инфраструктурни проекти за овој дел од општината.
Николоски истакна дека Николиќ е едно од најубавите места на брегот на Дојранското Езеро, со потенцијал да стане вистинска туристичка атракција, но за тоа, како што рече, потребни се три клучни чекори.
„Прво и најважно е да се реши проблемот со снабдувањето со електрична енергија, бидејќи Николиќ расте, се градат нови куќи и викендички, и постојната мрежа не може да ги издржи потребите,“ изјави Николоски.
Вториот проект што го најави е изградба на пешачка патека која ќе биде осветлена со канделабри и ќе води од селото до плажата на Николиќ, а третиот е уредување на самата плажа. „Плажата ќе добие концесионер кој ќе има обврска да ја уреди и да ја претвори во нова туристичка атракција,“ додаде тој.
Покрај овие проекти, Николоски посочи дека се разговара и за изградба на културен дом за локалните жители, како и за подобрување на условите за претшколско згрижување на децата.
На крајот, Николоски изрази уверување дека кандидатот на ВМРО-ДПМНЕ, Илија, ќе биде новиот градоначалник на Дојран и дека заедно со Владата ќе ги реализираат сите најавени проекти.
„Владата стои зад Илија и зад сите овие проекти што ќе го променат лицето на Николиќ,“ порача Николоски.