Хеликоптер се урна на планината Килиманџаро во Танзанија, при што загинаа пет лица, соопшти денес Управата за цивилно воздухопловство на Танзанија. Локалните медиуми објавија дека леталото било на мисија за медицинско спасување.
Според Националните паркови на Танзанија, загинати се водич и лекар од Танзанија, пилот од Зимбабве и двајца туристи од Чешка. Хеликоптерот се урна вчера во близина на кампот Барафу на планината.
Весникот Мвананчи и телевизијата Ист Африка јавија дека леталото било на медицинска мисија, повикувајќи се на началникот на регионалната полиција на Килиманџаро. Несреќата се случила на надморска височина од околу 4.700 метри, додека Килиманџаро, највисокиот врв во Африка, се издига на речиси 6.000 метри.