Основното јавно обвинителство (ОЈО) Струга соопшти дека до овој момент нема поднесено кривична пријава за настанот во кој момче беше прободено со нож и за чиј наводен сторител, граѓанин јавно го прозва министерот Тошковски.
Јавен обвинител е известен за случајот и во моментов, МВР постапува за документирање на настанот, обезбедување докази и вештачења.
ОЈО Струга појаснува дека лицето за кое постојат индиции дека е можен сторител е малолетно.
Доколку се обезбедат докази кои ќе дадат основано сомнение дека тој навистина го извршил делото:
- Постапката за него ќе се води од страна на судија за деца.
- Случајот ќе се процесуира согласно Законот за правда на децата.
„До Основното јавно обвинителство Струга до овој момент не е поднесена кривична пријава за настанот. Јавен обвинител е известен дека МВР постапува за документирање на настанот, обезбедување докази и вештачења. Лицето за кое постојат индиции дека е можен сторител е малолетно и доколку се обезбедат докази кои ќе дадат основано сомнение дека тој навистина го извршил делото, постапката за него ќе се води од страна на судија за деца и согласно Законот за правда на децата“, стои во соопштението од ОЈО Струга.
Соопштението на ОЈО Струга доаѓа откако брат на повреденото момче јавно го прозва министерот за внатрешни работи Панче Тошковски, тврдејќи дека неговиот брат се бори за живот во болница, додека лицето за кое тој го посочува како „убиец во обид“ е слободно и се шета во Грција.