НАТО распоредува дополнителен американски систем за ракетна одбрана „Патриот“ во јужната турска покраина Адана. Како што соопшти турското Министерство за одбрана, системот ќе биде стациониран во стратешката воздухопловна база Инџирлик, каде веќе е сместен воен персонал од САД и други сојузнички земји.
Ова е втор ваков потег на Алијансата во кус период. Минатата недела, во покраината Малатија веќе беше распореден еден систем „Патриот“ во близина на радарска база на НАТО, со цел да се зајакне воздушната одбрана од секојдневните ракетни закани од Иран.
Турција, иако располага со втората по големина армија во НАТО, сè уште нема сопствена целосно развиена воздушна одбрана. Официјална Анкара во моментов целосно се потпира на капацитетите на Алијансата стационирани во источниот Медитеран за пресретнување на иранските ракети.
Според турските власти, од почетокот на војната досега биле регистрирани три ракети испукани од Иран кои биле насочени кон нивна територија.