Јужната команда на САД (SOUTHCOM) синоќа соопшти дека американската војска извршила напад врз уште еден наводен брод за шверц на дрога во источниот Пацифик, при што загинале четири лица од бродот, пренесе ДПА.
Според SOUTHCOM, бродот наводно бил управуван од „назначена терористичка организација“ и пренесувал наркотици по добро позната рута за шверц.
„Четири машки наркотерористи на бродот беа убиени,“ објави SOUTHCOM на социјалната мрежа X.
Германската агенција ДПА потсетува дека американските сили во изминатите неколку месеци извршија слични напади врз бродови во Карибите и Пацификот, кои биле наводно полни со дрога, но честопати без јавно да презентираат докази за да ги оправдаат нападите.
Медиумските извештаи покажуваат дека досега во вакви операции се убиени речиси 90 лица, кои американската администрација ги опиша како шверцери на дрога и „терористи“.
ДПА нагласува дека овие вонсудски убиства предизвикаа широки критики, а експертите за човекови права на Обединетите нации тврдат дека дејствијата го кршат меѓународното право.
Шефот на Пентагон, Пит Хегсет, неодамна најави дека се планираат дополнителни напади.
„Тукушто почнавме да напаѓаме нарко-бродови и да ги ставаме нарко-терористите на дното на океанот,“ рече тој за време на неодамнешниот состанок на кабинетот.