Бројот на загинатите во превртувањето на преполн траект во езерото Кариба во Зимбабве се искачи на 72, меѓу кои има 18 деца. Спасувачките екипи извлекле уште 26 тела, соопшти полицијата.
Траектот се превртел во вторникот поради силни бранови. Пловниот објект патувал од градот Кариба кон оддалечени села и рибарски заедници во северозападниот дел на земјата, каде што патната инфраструктура е во лоша состојба, а можностите за јавен превоз се ограничени.
Властите сè уште немаат точни податоци за бројот на луѓе кои се наоѓале на траектот, ниту колку лица се водат како исчезнати. Според првичните проценки, на бродот имало околу 153 лица, иако бил предвиден за превоз на најмногу 90 патници.
Агенцијата за управување со катастрофи на Зимбабве соопшти дека 77 лица биле спасени.
Првично властите немале информации за точниот број деца кои се наоѓале на траектот, бидејќи оние кои не ја достигнале возраста за која се бара билет не биле вклучени во проценетиот број патници.
Подоцна објавениот полициски список покажал дека 16 од загинатите деца биле на возраст до 10 години, а најмладата жртва имала само една година.
Езерото Кариба е најголемото вештачко езеро во светот според волумен. Создадено е по изградбата на брана на реката Замбези кон крајот на 1950-тите и почетокот на 1960-тите години.
Езерото се протега на повеќе од 200 километри, а на места достигнува широчина од околу 40 километри. Кариба е поделено меѓу Зимбабве и Замбија, при што границата меѓу двете земји минува низ самото езеро.