МВР: Куќен притвор на странски државјанин на туѓа адреса е преседан

Министерството за внатрешни работи во писмено соопштение вели дека до Јавното обвинителство за гонење на организиран криминал и корупција доставило основи на сомнение за кривични дела кои ги сторил избеганиот Блерим Рамадани, но и за лицата кои носеле одлуки за неговата екстрадиција.

Во соопштението кое го објавија предмалку МВР повторуваат дека тие ја завршиле својата работа и по апсењето Рамадани бил спроведен пред судските органи. Но за  Министерството преседан е носењето одлука за мерка притвор за странски државјанин.

-Во врска со  информациите кои непрекинато се шират по медиумите, а  се поврзани со бегството на лицето Блерим Рамадани, известуваме дека на 17.07.2024 година на ГП Јажинце од страна на граничната полиција истиот е приведен и предаден на СВР Тетово, по што е спроведен пред судските органи. Напоменуваме дека натамошното постапување на судот не е надлежност на Министерството за внатрешни работи, но со оглед на тежината и сериозноста на делото за кое тој се товари и имајќи во предвид дека станува збор за странски државјанин, судот донесува одлука која државните институции тешко можат да ја спроведат во целост. Имено, мерката куќен притвор на странски државјани на туѓа адреса на живеење е преседан во досегашната практика. Напоменуваме дека и покрај споменатото, МВР продолжува со преземање на  сите оперативно тактички мерки и активности. До ОЈО за ГОКК од страна на ОСОСК доставено е известување во кое се наведени и во целост објаснети  основите на сомневање за сторени кривични дела од страна на лицето Блерим Рамадани, како и основи на сомневање за сторени  кривични дела од страна на службени лица кои донесувале одлуки за екстрадиција на посоченото лице и постапувале по истите.

Врз основа на наведеното од страна на надлежен Јавен обвинител при ОЈО за ГОКК издадени се писмени Наредби и дадени се насоки по кои ОСОСК постапува, се вели во дописот од МВР.