Проширувањето на ЕУ не е само технички процес, туку стратешка инвестиција во безбедноста, стабилноста и конкурентноста на Европа. Безбедна и просперитетна Европа не може да биде целосна без целосна интеграција на Западен Балкан, порача министерот за надворешни работи, Тимчо Муцунски, на Состанокот на министрите за надворешни работи на Процесот за соработка во Југоисточна Европа (ПСЈИЕ) во Софија, во рамки на бугарското претседавање со иницијативата.
Муцунски нагласи дека во услови на војна во Европа, хибридни закани, дезинформации, енергетска несигурност и сајбер ризици, европската интеграција и регионалната соработка имаат уште поголемо стратешко значење. Кредибилитетот на процесот зависи од доследното почитување на обврските, предвидливоста и принципот на заслуги.
„Мора да бидеме искрени: заслугите мора да имаат значење, обврските да се почитуваат, а правилата на процесот да бидат предвидливи. На Западен Балкан му е потребен европски пат заснован на резултати, а не на одложувања“, истакна Муцунски.
Состанокот во Софија, посветен на 30-годишнината од ПСЈИЕ, ги истакна европската перспектива на регионот, регионалната соработка, безбедноста, економскиот развој и конкурентноста. Муцунски посочи дека ПСЈИЕ останува клучен механизам за политички дијалог и соработка, создаден и воден од регионот.
Министерот нагласи и значењето на регионалната поврзаност преку транспортната, енергетската и дигиталната инфраструктура, особено Коридорите 8 и 10, како и инвестирањето во човечкиот капитал како предуслов за долгорочен развој и конкурентност.
„Човечкиот капитал е нашиот најголем ресурс. Без инвестирање во луѓето, ниту еден инфраструктурен проект и ниту една економска реформа не можат да го достигнат својот целосен потенцијал“, рече Муцунски.
Советот за регионална соработка, како што истакна, игра важна улога во унапредувањето на економската интеграција, поврзаноста и одржливиот развој.
На крајот, министерот порача дека иднината на Југоисточна Европа е неразделно поврзана со иднината на Европа и дека регионот може да биде активен придонесувач кон европската безбедност и просперитет.
Во рамки на состанокот беше усвоена Заедничка декларација за поддршка на европската интеграција, добрососедските односи и демократските вредности, како и за градење поотпорен, поконкурентен и поодржлив регион.
ПСЈИЕ, основана во 1996 година во Софија, останува автентична регионална платформа за политички дијалог и соработка, која во изминатите три децении значајно придонела кон довербата, стабилноста и европската перспектива на Западен Балкан.