Министерот за надворешни работи и надворешна трговија, Тимчо Муцунски, денеска ја отвори пленарната сесија на Регионалниот форум за одржлив развој на UNECE во Женева, каде настапува како ко-претседавач. Во услови на комплексни глобални предизвици, тој ја истакна неопходноста од забрзување на имплементацијата на Агендата 2030.
Муцунски преку својот профил на Фејсбук порача дека со оглед на краткиот рок до 2030 година, неопходно е да се делува побрзо и поорганизирано. „Со помалку од пет години до 2030 година, клучно е да се делува побрзо, попаметно и заедно, со конкретни и координирани активности што ќе дадат резултати“, напиша министерот.
Според него, еден од клучните проблеми е поделеноста во дејствувањето. „Посочив дека фрагментацијата го ограничува напредокот и дека постигнувањето на Целите за одржлив развој бара силна координација меѓу институциите, секторите и државите, како и интегриран пристап што ги поврзува дипломатијата, развојот и економската политика“, истакна Муцунски.
Тој ја потврди посветеноста на земјава кон исполнување на целите преку конкретни политики насочени кон зелена трансформација, дигитален развој, зајакнување на институциите и унапредување на регионалната и мултилатералната соработка. Форумот во Женева собра високи претставници од Обединетите нации, државите членки, како и претставници од граѓанскиот и приватниот сектор.