Напорите за изнаоѓање достоинствено решение кое ќе ги зајакне македонските позиции и ќе обезбеди предвидлив евроинтегративен процес се во фокусот на актуелната владина политика од првиот ден, истакна министеро за надворешни работи и надворешна трговија, Тимчо Муцунски. Гостувајќи во вестите на телевизијата „Канал 5“, тој информираше дека интензивно се води дијалог со земјите членки на Унијата, европските институции и со соседна Бугарија, но досега сè уште нема постигнато договорен текст што би бил прифатлив за државата.
Осврнувајќи се на црвените линии на земјата и неопходноста од зачувување на националните интереси, министерот детално ја појасни позицијата на државата:
„Клучно е да има предвидливост во процесот на интеграција. Уште еднаш нагласувам дека апсолутно не сме подготвени да разговараме за прашања поврзани со идентитетот и историјата. Додека оваа Влада ја води државата, националните позиции ќе бидат пред сè, а истовремено ќе продолжиме да работиме на внатрешните реформи“, истакна Муцунски, соопшти МНРиНТ.“
Коментирајќи го концептот на постепена интеграција, шефот на дипломатијата оцени дека се очекуваат промени преку кои земјите кандидати би добиле зголемени права и поголем пристап до европските фондови уште пред формалното членство. Тој нагласи дека домашните реформи се спроведуваат во интерес на граѓаните и бизнис-заедницата, а не само за задоволување на формални критериуми.
Поврзано со докажувањето на реформската посветеност преку конкретни чекори, министерот додаде:
„Мораме да направиме сè што е потребно од наша страна и тоа да го покажуваме не само со зборови туку и со дела, како што го правиме преку реформската агенда. Не треба да се чека до недоглед, но го немаме луксузот да прифатиме сè по секоја цена, како што беше направено во минатото, и по одреден период, повторно да ја водиме истата дебата што ја водиме денес“, нагласи тој.“
На крајот од своето обраќање, Муцунски упати критики кон опозициските структури, обвинувајќи ги дека декларативно се залагаат за европска интеграција, додека практично ги кочат реформските закони во Собранието.