Министерот за надворешни работи и надворешна трговија, Тимчо Муцунски, категорично ги отфрли шпекулациите дека Македонија ќе прифаќа мигранти или одбиени баратели на азил од Обединетото Кралство.
„Во ниту една форма, и легални и нелегални, вакви, такви, никакви мигранти нема да бидат примени во нашата држава врз основа на која било форма на договор со Обединетото Кралство“, изјави Муцунски.
Муцунски додава дека опозицијата ширела паника, и покрај тоа што Владата јасно ги демантирала овие тврдења:
„Ниту одбиени баратели за азил. Ниту ќе бидат во посебни… Ни тоа, ни тоа нема да го има. Никаков пакет поврзан со мигранти или одбиени баратели на азил нема оваа влада да склучи, ниту преговарала за такво нешто, ниту имала намера да преговара за такво нешто“, додаде министерот.
Министерот ја отфрла и можноста некој во Владата неофицијално да дал сигнал до британските власти:
„Апсолутно е јасно кој во Владата има и кој во оваа држава има надлежност да дискутира по ова прашање… двата документи се јавни, никаде нема спомнување на темата за прифаќање мигранти или прифаќање нелегални баратели на азил“, додаде Муцунски.