Силен земјотрес со јачина од 7,3 степени според Рихтеровата скала денеска го погоди јужниот брег на Мексико, во близина на границата со Гватемала, предизвикувајќи силно тресење во повеќе земји од Централна Америка. Властите засега не пријавуваат жртви ниту поголеми материјални штети.
Според Американскиот геолошки институт (USGS), епицентарот на земјотресот бил на околу 48 километри југозападно од Акилес Сердан, во мексиканската држава Чијапас, на длабочина од околу 15 километри. Првичната проценка за магнитудата од 7,4 степени подоцна беше ревидирана на 7,3.
Потресот силно се почувствувал во Гватемала и Ел Салвадор, каде што жителите ги напуштале своите домови и деловни објекти. Во главниот град на Гватемала биле евакуирани повеќе згради, додека службите за итни случаи започнале проверки на инфраструктурата и можните оштетувања.
По главниот земјотрес биле регистрирани најмалку пет посилни последователни потреси со магнитуда меѓу 5,1 и 6 степени. Во делови од Гватемала се случиле помали одрони на патиштата, а наставата била прекината во неколку западни региони.
Американскиот систем за предупредување од цунами соопшти дека постои можност за опасни бранови на пацифичкиот брег во радиус од 300 километри од епицентарот. За одредени крајбрежни подрачја во Мексико и Гватемала беа прогнозирани бранови високи од 30 сантиметри до еден метар над вообичаеното ниво.
Мексиканската морнарица соопшти дека не се очекуваат сериозни последици по крајбрежјето, но ги повика жителите и туристите привремено да се оддалечат од плажите и да не се приближуваат до брегот најмалку шест часа по земјотресот.
Мексиканската претседателка Клаудија Шејнбаум изјави дека првичните проверки не покажале поголеми штети, додека локалните власти во Чијапас продолжуваат со инспекција на населените места, патиштата, мостовите и крајбрежните области.
Земјотресот бил почувствуван и во Мексико Сити, но автоматскиот систем за предупредување не бил активиран бидејќи енергијата регистрирана во првите секунди не го достигнала потребниот праг.
Јужниот дел на Мексико се наоѓа во една од најактивните сеизмички зони во светот, каде што се судираат неколку тектонски плочи. Поради релативно плиткиот епицентар и близината до брегот, надлежните служби продолжуваат внимателно да ја следат состојбата и нивото на морето.