Министерството за надворешни работи и надворешна трговија информира дека, според најновите податоци, од почетокот на конфликтот до денес, вкупно 473 македонски државјани контактирале со дипломатско-конзуларните претставништва на Република Северна Македонија во Тел Авив, Доха и Абу Даби.
Од нив, 19 лица се од Израел, 106 од Катар, а 348 граѓани се обратиле до ДКП Абу Даби. Во оваа бројка се вклучени и 18 лица од Кувајт и 12 лица од Бахреин, соопшти МНРиНТ.
Според информациите од надлежните власти, сè уште не се препорачува евакуација по копнен пат за граѓаните кои се наоѓаат во Катар и Обединетите Арапски Емирати. Евакуацијата ќе се спроведе при првата безбедна прилика, а веќе се разгледуваат опциите за нивно безбедно извлекување веднаш штом ќе се создадат соодветни услови.
Во однос на македонските државјани во Тел Авив, од МНРиНТ информираат дека активно се разгледуваат можни алтернативи за нивно безбедно извлекување од Израел.
„Уште еднаш апелираме до македонските државјани редовно да ги следат предупредувањата и насоките на локалните надлежни органи. На 24-часовно располагање се дежурните телефонски броеви на кризниот штаб при Министерството, како и контактите на дипломатско-конзуларните претставништва“, соопштија од Министерството.
Дополнително, Министерството уверува дека за сите нови информации јавноста ќе биде навремено информирана.