Претседателката на Пратеничката група на Собранието за соработка со Парламентот на Државата Израел, Рашела Мизрахи, заедно со членовите на Пратеничката група, остварила средба со делегација на Министерството за регионална соработка на Државата Израел.
Како што соопшти собраниската прес-служба, на средбата било изразено задоволство од пријателските односи и досегашната институционална соработка меѓу двете земји. Мизрахи истакнала дека парламентарната соработка има значајна улога во градењето стабилни и трајни односи и во отворањето можности за нивно натамошно унапредување.
Во фокусот на разговорите било продлабочувањето на соработката во повеќе области од заемен интерес, меѓу кои образованието и универзитетската соработка, старт-ап компаниите, земјоделството, енергетиката, индустријата, технологијата, како и унапредувањето на деловната соработка меѓу двете земји.
На средбата се разговарало и за евроинтегративниот процес и патот на нашата земја кон членство во Европската Унија.
Од Собранието додаваат дека соговорниците се согласиле дека создавањето подобра иднина е во интерес на двата народа и на двете држави, а дека тоа може да се гради преку подобро поврзување, размена на искуства и континуирана соработка.