Во рамки на вечерашната емисија „За или против“ на Алфа телевизија, гостуваше градоначалникот на општина Аеродром и кандидат за уште еден мандат, Дејан Митески. Тој нагласи дека останува целосно посветен на развојот на општина Аеродром и најави нови проекти кои ќе бидат претставени во текот на кампањата.
„Програмата ја правевме заедно со граѓаните, одржавме повеќе од 15 средби и илјадници граѓани се приклучија и дадоа свој идеи. Имаме многу интересни проекти кои ќе ги презентираме, ќе слушнат аеродромци, проекти коишто се на нивно барање. Во однос на поддршката од Владата веќе од првиот повик, реализираме, во фаза на реализација, дел се завршени, дел се во завршна фаза, 8 проекти коишто ги добивме со поддршка на Владата“, рече градоначалникот Митески.
Митески истакна дека граѓаните знаат да препознаат искрена посветеност и конкретни дела и додаде дека проектите ќе бидат реални и видливи за граѓаните во Аеродром.
„Во вториот повик веќе сите се тендерирани и многу наскоро ќе отпочнеме со реконструкција на повеќе од 20 улици низ цел Аеродром. Изградба на мултимедијален центар, втора фаза на ОУ „Блаже Конески“ со спортска сала, веќе во завршна фаза тендерот за доградба на ОУ „Гоце Делчев“. Тоа се се проекти коишто ќе ги отпочнеме за многу скоро и ќе бидат реални и ќе бидат видливи за граѓаните“, заклучи Митески.