Дарко покажа што значи чесност, одговорност и вистинска посветеност. Покажа дека кога се работи со срце, се гледа разлика. Дарко е вистинскиот избор за Бутел, а резултатите се тука, порача Владо Мисајловски, потпретседател на ВМРО-ДПМНЕ и министер за одбрана, од митингот во Бутел.
Тој пред големиот број насобрани граѓани наброја дел од проектите кои беа реализирани изминатиов период во општината.
-Ново корито на реката Серава со трим патека, ново основно училиште во Визбегово, нова градинка во Бутел 1, изградба на градинка која е при крај во Бутел 2, нов плоштад, парк од 10.000 метри квадратни во Радишани, 5 нови спортски центри целосно опремени, 15 нови спортски терени. И тоа не е се, уште многу резултати. Во Бутел ќе има инвестиции и проекти. Дарко со посветено работење ќе започне изградба на базен, две нови училишта во Љубанци и Љуботен, ќе се изградат три нови градинки во различни населби, проект за вода во Љуботен започнува, тендерот за нова поликлиника е веќе распишан и почната е изградба на базен во Радишани, истакна Мисајловски.
Посочи дека резултатите се гледаат поради чесната работа.
Мисајловски истакна дека Дарко Костовски и во новиот мандат ќе ја има поддршката од Владата и дека сите проекти ќе се реализираат.