Премиерот Христијан Мицкоски денеска ги коментираше најавите на опозицискиот СДСМ и нивниот лидер Венко Филипче за предлог-закон за борба против корупцијата. Според него, иницијативата доаѓа од структури кои во минатото носеле законски измени со кои се овозможи застарување на судски дела.
Мицкоски истакна дека првично сметал оти најавите за ваков закон не се сериозни, со оглед на претходното делување на опозицијата.
„Пред неколку недели, кога првпат ја слушнав оваа иницијатива, мислев дека станува збор за нешто што би можело да се прочита во рубриката „Верувале или не“. Затоа се воздржав од коментар и почекав извесно време. Но, гледам дека тие сериозно ја промовираат оваа идеја и очигледно навистина веруваат во неа. Кои се тие луѓе, тоа се луѓето или дечињата на принцопт на криминалот, кои за да се амнестира себе си и криминалот, што го правеше, заедно со нив, неговите дечиња, кои сега си инсталираше во СДСМ, го смени Кривичниот законик и од него избвриша неколку члена со кои што практично се амнестираше целокупниот криминал, што го правеа како Влада“, изјави Мицкоски.
Претседателот на Владата упати критика за актуелните јавни настапи на СДСМ поврзани со оваа тема. И денес, без никаква задршка, додаде тој, десетина дена ја малтретираат македонската јавност дека токму тие ќе бидат носители на борбата против корупцијата.
Во однос на обвинувањата од опозицијата за политички притисок, премиерот порача дека во државата се почитуваат правните процедури и дека нема потреба од страв кај политичките чинители.
„Искрено, тешко ми е да се изначудам на тоа што го слушам. Но главна работа што ги вознемири е што во последно време станав многу чувстувителен и тоа го артикулираат дека јас практично со моите чувства нарачувам обвинителски истраги и се исплашија од сето тоа и побрзаа сега да се претстават како жртва на некаков политички прогон. Не треба да се плашат затоа што во оваа држава со оваа Влада изминативе две години владеат законите, Уставот и ако се навистина безгрешни како што велат тогаш не треба да се плашат од каков било судски процеси, но не верувам и имам чувство дека не е така“, изјави Мицкоски, одговарајќи на новинарско прашање по отварањето на новиот базен „Карпош“.