Царинската управа ги бележи најдобрите резултати во своето 34-годишно постоење, со остварени највисоки приходи досега. Ова беше главната порака на премиерот Христијан Мицкоски на денешниот свечен настан одржан во Филхармонијата по повод јубилејот на институцијата.
Според премиерот, во изминатите 20 месеци е направен сериозен пресврт во работењето, што резултирало со надминување на психолошката граница од 12 милијарди денари приходи во само еден месец.
„Остварени се највисоки приходи досега, што е јасен показател дека институцијата функционира поефикасно, поорганизирано и со поголема одговорност. Овој резултат не доаѓа случајно, туку е производ на системски пристап, засилени контроли и подобра координација“, истакна Мицкоски.
Осврнувајќи се на состојбата пред 20 месеци, премиерот потенцираше дека Владата не наследила беспрекорен систем, туку затекнала хаос, нарушени процеси и со години запоставувана институционална поставеност. Денес, како што рече, таа фаза е надмината, нормализацијата е завршена и воспоставен е ред преку дигитализација и бескомпромисна борба против корупцијата.
Мицкоски упати директна благодарност до директорот на Царинската управа, Бобан Николовски, за неговото успешно раководење, но ја истакна и клучната улога на одличната координација со министерката за финансии, Гордана Кочоска-Димитриеска.
„Тоа партнерство е еден од клучните фактори за постигнатите резултати. Кога институциите работат како тим и имаат јасна цел – резултатите не изостануваат“, подвлече премиерот, додавајќи дека модернизацијата и спречувањето на нелегалните активности остануваат врвен приоритет.