Премиерот Христијан Мицкоски денеска оствари средба со командантот на Националната гарда на американската сојузна држава Вермонт, генерал-мајор Грегори Најт. Средбата се одржа во присуство на министерот за одбрана Владо Мисајловски, амбасадорката на САД, Анџела Агелер, и генерал-мајор Сашко Лафчиски.
Мицкоски во својата објава на Фејсбук посочи дека главна тема на разговорот било „продлабочување на соработката меѓу нашите институции“.
„Во разговорот се осврнавме на продлабочување на соработката меѓу нашите институции, особено во домените на обуката, размената на искуства и поддршката во изградбата на модерни и ефикасни одбранбени капацитети,“ напиша Мицкоски.
Истиот ден, претседателката Гордана Сиљановска – Давкова на свечена церемонија ќе го одликува генерал-мајор Грегори Најт.
Кабинетот на претседателката информира дека Најт ќе добие Орден за воени заслуги за неговиот особен придонес во продлабочувањето на македонско-американското пријателство и воената соработка. Оваа соработка резултирала со бројни активности за зајакнување на капацитетите и зголемување на борбената готовност на македонската армија.