Премиерот Христијан Мицкоски денеска од собраниската говорница најави дека вработените во образованието и здравството ќе го добијат ветеното покачување на платите согласно колективните договори. Ова зголемување граѓаните ќе го почувствуваат веќе со исплатата на мартовската плата во текот на месец април.
Мицкоски појасни дека оваа мерка ги опфаќа сите вработени во државната и јавната администрација кои имаат потпишано колективни договори со актуелната влада.
„Да, ќе го добијат зголеменото покачување коешто е дел од колективниот договор вработените во образованието, исто како што ќе го добијат и вработените во здравството и исто како што ќе го добијат сите од државната и јавна администрација коишто се со колективни договори потпишани од оваа влада“, дециден беше премиерот.
Дополнително, тој информираше дека Владата веќе го усвоила текстот на новиот колективен договор за администрацијата, усогласен со синдикатите УПОЗ и САДУ, кој по финализирањето на техничките детали треба да биде потпишан в понеделник.