Претседателот на Владата, Христијан Мицкоски, денеска официјално ги промовираше 100-те нови возила за потребите на АД „Македонска пошта“, нагласувајќи дека оваа инвестиција означува нов почеток за претпријатието. Според премиерот, набавката е одговор на долгогодишното занемарување на системот.
„Просечната старост на досегашните возила беше 15 години. Тоа значеше застарена опрема, чести дефекти и доцнење на пратките. Решивме да ставиме крај на тоа. Институциите постојат за да служат, а не да бараат оправдување“, истакна Мицкоски во своето обраќање.
На настанот присуствуваа и вицепремиерот и министер за транспорт, Александар Николоски, како и раководството на АД „Македонска пошта“, кои порачаа дека модернизацијата на јавните услуги останува врвен приоритет на Владата.