Премиерот Христијан Мицкоски очекува развојот на нови индустрии, меѓу кои и дата-центрите и секторите поврзани со нив, да создаде подобро платени работни места и услови дел од младите Македонци кои живеат во странство да се вратат во земјата.
Тој се повика на податоци од Државниот завод за статистика според кои бројот на вработени од третиот квартал на 2024 до вториот квартал на 2026 година се зголемил од околу 691.000 на 708.000 лица, односно за приближно 17.000.
„Ако тоа го преточите во бројки, ќе сфатите дека претходната влада за седум години нема толку нови работни места отворено“, изјави Мицкоски.
Според него, следниот чекор е отворање работни места во индустрии со поголема додадена вредност, кои би биле доволно атрактивни и за луѓето кои веќе ја напуштиле државата.
„Со оваа индустрија и придружната индустрија која ќе ја сервисира, очекувам голем дел од нашите, посебно младите кои се надвор од Македонија, да се вратат дома и тука да го продолжат животот со своите семејства“, рече премиерот.
Мицкоски оцени дека условите за живот во земјите од Западна Европа веќе не се исти како пред пет или десет години и смета дека тоа може дополнително да влијае врз одлуката на дел од иселениците да размислат за враќање во Македонија.
Како позитивен сигнал тој го посочи и зголемениот интерес за инженерските факултети. Според информациите што ги добил од Машинскиот факултет, интересот за запишување е зголемен за околу 30 проценти. Мицкоски смета дека младите го препознаваат правецот во кој се движат технологијата и економијата, особено во инженерството, вештачката интелигенција и дата-центрите.
„Имаме амбиција, знаеме каде да ја развиваме земјата и тоа е неповратен пат“, порача Мицкоски, додавајќи дека изборот е дали Македонија активно ќе се вклучи во новиот технолошки циклус или повторно ќе ги следи процесите откако тие веќе ќе се случат.