Владата подготвува ново потрошувачко портфолио во соработка со дистрибутерот „ЕВН Хоум“ и државниот производител ЕСМ. Целта на овие активности, како што најави денеска премиерот Христијан Мицкоски од Виница, е да се обезбеди просечна цена на струјата која би била за 5 до 10 отсто пониска од моменталната.
Премиерот појасни дека во тек е анализа на индикаторите кои треба да овозможат распишување на огласот на крајот од годинава, со цел граѓаните да ги почувствуваат ефектите веќе во следната година.
„Така што ние сега практично ги подготвуваме сите индикатори, за да можат тие на крајот од годината да го распишување на огласот и веќе за следната година да обезбедиме, можеби еден од ретките случаи ќе биде во Европа, ако не и единствен, каде што граѓаните би добиле до 5 проценти, а можеби и повеќе, пониска цена на електричната енергија. Тоа ќе биде нешто што досега не се случило – да ги искористиме поволностите на обновливите извори на енергија, тоа е Сонцето, и во тој микс во текот на целата година да обезбедиме просечна цена на електричната енергија којашто, еве, јас сум умерен оптимист, би била 5 до 10 проценти поевтина од сегашната. Но, ајде да видиме како сето тоа ќе го операционализираме“ – рече Мицкоски.
Финансиска консолидација на енергетските компании
Претседателот на Владата подвлече дека крајната цел за оваа година е државата по првпат да стане нето извозник на електрична енергија. Тој сподели и оптимистички прогнози за финансиското работење на државната компанија ЕСМ.
„Добро е што и државната ЕСМ се консолидира и во првиот квартал, или да бидам попрецизен, очекувам во првата половина од годината за првпат да имаме позитивни резултати, од оние 150 милиони евра загуба што ги наследивме, да имаме, мојата прогноза е меѓу 6-7 милиони евра добивка. Ќе видиме“ – изјави Мицкоски.
Заштита на земјоделското земјиште од соларни паркови
Во однос на проектите за обновливи извори на енергија, премиерот упати критики до претходната власт за поставување капацитети на плодна почва, најавувајќи законски измени со кои се става крај на ваквата пракса.
Новите правила предвидуваат соларни проекти да се градат исклучиво на земјиште од петта категорија нагоре, за да не се загрози домашното земјоделство.
Милионски инвестиции во ветерни паркови и полни акумулации
Мицкоски најави дека веќе во тек на овој месец ќе се интензивираат активностите на терен за изградба на големиот Ветерен парк кој ќе ги опфати општините Штип, Карбинци и Радовиш, проект вреден околу половина милијарда долари.
„Веќе теренските активности се почнати. Ценам дека овој месец јуни ќе ве поканиме да бидете присутни и таму на терен, да гледате како тој проект се развива. Финансиската конструкција е завршена, отприлика околу половина милијарда долари. И она коешто го работиме со истиот инвеститор е уште еден таков сличен проект да имаме таква инвестиција во североисточниот дел на земјата, со отприлика слична инвестициска активност од околу половина милијарда долари“ – истакна тој.
На крајот, премиерот информираше дека државните акумулации се консолидирани и се наоѓаат на 80 отсто исполнетост, за разлика од претходните години кога паднале на критични 7 проценти, со што е обезбедено непречено наводнување преку хидросистемот „Брегалница“.