Иницијативата на премиерот Христијан Мицкоски за лидерска средба предизвика остра поларизација на политичката сцена. Додека Мицкоски од Гевгелија повикува на зрелост и консензус за европските закони, лидерот на СДСМ, Венко Филипче, категорично ја одби поканата, нарекувајќи ја „стапица“ за предвремени избори.
Одговарајќи на обвинувањата на Филипче дека владата е „криминална“, Мицкоски оцени дека ваквиот речник е дел од „менаџерскиот договор“ на Филипче како претседател на СДСМ и доказ за неодговорноста на опозицијата.
„До скоро тие бараа лидерска средба, сега кога има лидерска средба ја одбиваат… Навистина едно би рекол збунувачко и нејасно однесување,“ изјави Мицкоски.
Тој најави дека поканите ќе бидат испратени до сите парламентарни партии за средба во Клубот на пратеници. Според него, доколку СДСМ не сака да учествува, владата со своето двотретинско мнозинство ќе продолжи со реформите, вклучително и со законите за јавно обвинителство и судски совет кои се дел од европската агенда.
„Ако сакавме да се однесуваме незрело… тогаш можевме тоа да го направиме и без таа лидерска средба. Но сакавме да тоа лидерска средба да поразговараме и за реформските закони,“ додаде Мицкоски.
Претходно, Венко Филипче ја отфрли можноста за дијалог, обвинувајќи дека Мицкоски бара алиби за избори за да спроведе штетно сценарио со мигранти и задолжувања.
„Средба со криминалци нема да има. Нема средба за техничката влада. Мицкоски е во тесно, му се брза и бара алиби за распишување на предвремени избори,“ беше дециден Филипче.
Лидерот на СДСМ смета дека техничката влада мора да остане како единствена брана против, како што вели, партизацијата на институциите и правосудството од страна на ВМРО-ДПМНЕ.
Клучната точка на разединување останува техничката влада. Мицкоски смета дека е „политички некултурно“ таа да се укине без консензус, иако го кочи системот, додека Филипче инсистира таа да опстане. Засега, изгледите за заедничка маса се минимални, а политичкиот дијалог се води преку прес-конференции и меѓусебни обвинувања.